بمناسبة الخبر المنتشر اليوم عن إنفصال نجل الإعلامي عمرو الليثي وابنة الإعلامي تامر أمين بعد زواج دام شهرين فقط!!
ويرى البعض إن السر في الارتياح، عادي اتنين ما ارتاحوش مع بعض أو مفيش بينهم تفاهم كل إنسان ليه شخصية وطريقة تفكير ونمط حياة مختلف عن التاني فيه اللي بيعرف يكمل ويتأقلم ويعدي الأمور ويحتوي الموقف ويمتص غضبه، وفيه اللي مبيعرفش يمسك أعصابه، أما النوع التالت صعب إنك تتأقلم أو تتعايش معاه أو تعديله المواقف، حتى لو أخد فرصة واتنين وتلاته للتغيير مبيتغيرش لأن إيه فايدة إنك تدي إنسان مليون فرصة للتغيير والنتيجة هي هي مش هيتغير لأنه غير قابل للتغيير، بقى أسهل قرار هو الانفصال، سريع سريع، زي رتم الحياة السريع، الموضوع في الأول والأخر نصيب، هتقولي بس شهرين قليل ع الكلام ده، قليل على أن اتنين يفهموا دماغ بعض ويعدوا لبعض عشان الحياة تكمل، هقولك إن كل إنسان وليه طاقة معينة، وقدرة على التحمل تتفاوت بينه وبين اي شخص تاني، فيه اللي بيعرف يصبر ويكمل في إعطاء الفرص وينتظر النتيجة، وفيه اللي بيفهم الجواب من عنوانه، ويشوف الصورة واضحة بدري بدري..
الملخص إن فيه ناس صعبة العشرة، صعب الحياة معاها، صعب تكمل مشوار عمرك بيها، عمر الحياة مهما طال فهو قصير، فلا داعي لقضاءه في معارك ومشاحنات وحياة مليئة بالصعوبات..
الحياة أبسط من إننا نعيشها مع ناس تملاها صراعات وسلبيات وإحباطات إحنا عايزين نعيش ونستمتع ونكبر وننجح ونستقر نفسيا ومعنويا..