بقلم / دينا الفخرانى
واعزفلى لحن الحب يالليل ...
دا انا سهرى دايما بكا ومواويل
نفسى ارقص ي ليل ، وأفرد شعرى يغطى القمر
افرح ولأول مره يحلى السهر
افرح ي ليل .
دا انا ليا حكايه ولا الف ليله وليله
الف ليله من الوجع
تعرف ي ليل أنا اللى سرقت النجم
اخدته فى حضنى وتاويته فى قلبى
مكنتش اعرف ي ليل
أنه أول ما يحن هيروح ملهوف للقمر
طب ما انا زى القمر
دا انا هو القمر .
نفس الوحده والوجع
لا ليا ونيس ولا حتى حبيب
ومش عاوز اكتر ي ليل
عاوزه أحلم ي ليل
أنت بس اعزف وسيبنى احلم
هنسج حلمى من نجومى
وأغزلها حكايه تحلى بيها السهر
دا انا منك ي ليل .
حكايتك هى حكايتى
نفس الضلمه فى ملامحى
دا غربة طريقى كانت بسببك ي ليل
مش انت اللى توهتنى
مشيت معاك راضيه ورجعت منك تايهه
لا ليا أرض ولا مرسى .
اعزف تانى ي ليل
اقولك اعزف من الأول
وسيبنى أهمس مع نجومك وأفرد شعرى يغطى القمر
بس أنت اعزف لحن الحب ي ليل .