بقلم /شيماء النجار
يا الله للمرة المليون مش لاقي شغل حلها من عندك يارب .
▪︎السلام عليكم ، انا كريم مصطفي خريج تجارة من عيلة نوعًا ما عارفين نعيش بسبب صعوبة الحال المادى ، بدور على شغل من حوالى 11 شهر ومش لاقي ...
_ لسه ملقيتش شغل يا كريم؟!
كريم بحُزن : للأسف لا يا أمي مفيش .
_ خلاص ماتشلش هم كدا كدا معانا معاش ابوك على شوية فلوس كدا محوشاهم من زمان نمشي بيهم حالنا لحد ما ربنا يفرجها ..
كريم : لا هحاول تاني وهنزل بكرة ان شاء الله ادور يمكن الاقي...
_ ماشي يابني ، ربناا يلطف بيك ويجعلك سبب في نفع الناس ويديك على قد كرمه .
كريم : يارب يا أمي دعواتك دايما .
في الصباح ..☆
= اناا ماشي يا أمي محتاجة حاجة اجبهالك معايا
_ ماتحرمش منك يابني ربنا يراضيك المرادى .
بعد ساعتين ..
= لا بجد تعبت وكمان جعاان بس مش معايا فلوس كفاية اعمل ايي ياربي ، خلاص هروح اجيب اي حاجة اكلها وتفرج .... لُطفك يارب .
كنت رايح اجيب أكل فعلاً لانى فاصل من الجوع وجبت ورايح اقعد عشان اكل بس فجأة لمحت طفل ميتعداش ال7 سنين متخبي ورا شجرة وبيبكي فرجلى خدتني ناحيته عشان اشوف ماله وسألته فعلاً وكان رده وهو بيبكي ..
_ اناا بردان يا عمو واديلي يوم ونص كدا مأكلتش خالص خالص .
يارب لُطفك بصراحة صِعب علياا جدا وخصوصا إنه طفل صغير بيقاوم البرد والجوع فلوهلة اخدت بالى ان معايا الاكل ال لسه مشتريه فابتسمت وقعدت جمبه على الارض وبكل رضي اديته ال معايا كله وحرفيًا انا شبعت لما هو أكل وشبع وكمان الجاكت ال كنت لابسه ايوا كبير عليه بس اهو يدفي .
كريم : صحيح مقولتليش اسمك ايي يا حلو انت
_ كرم اسمي كرم
كريم : ياااه اسمك قريب من اسمي اوي انا ياعم اسمي كريم
كرم ببرائة : انت لطيف اوي ياعمو كريم يارب تفرح دايما وتبقي مبسوط زي ما فرحتني .
كريم : يارب ، يلا اسيبك بقي وهنتقابل تاني ان شاء الله لو ربنا أراد .
روحت البيت وكالعادة مهموم بسبب انى مش لاقي شغل بس ال مريحني إني بعمل ال علياا وراضي ب اي حاجة ربنا يبعتهالي ... فجأة وانا بتصفح الفيسبوك لقيت اعلان عن وظيفة في شركة كبيرة ومحتاجين اتنين محاسبين فرحت جداا بس لوهلة حسيت بالاحباط لان كتير هيقدم والشركة محتاجة اتنين بس ، فقررت اطنش واشوف غيرها بس فى النهاية اقنعت نفسي انى انزل اقدم وال فيه الخير يقدمه ربناا ..
ونزلت تاني يوم الصبح وفعلاً قدمت والحمد لله بفضل ربناا كنت من الاتنين ال اختارتهم الشركة وبدأت في شغلي وطورت من نفسي كتير ، واناا دلوقتي بحكيلكم حكايتي من داخل الحرم المكي ومعايا امي بعد ما حالنا المادي اتحسن كتير ، ودا كله بسبب الطفل ال ربنا جعلني سبب في اني اقدر اساعده بحاجة بسيطة حقيقي الحمد لله .
يقول ابن القيم : أرخِ يدك بالصدقة تُرخي حبال المصائب من على عُنقك وأعلم أن حاجتك إلى أجر الصدقة أشد من حاجة ممن تتصدق عليه ..
باختصار شديد الصدقة قادرة بإذن ربنا طبعا تحل اي مشكلة في حياتك مهما كانت ايي ، المهم تكون النية خالصة لله مش مهم حاجة كبيرة ولا مبلغ كبير أقل حاجة لو بإخلاص من صاحبها تُقبل عند الله .
وكمان مهما بتضيق بيجي يوم وتفرج مفيش بلاء بيستمر العمر كله .
وأخيرًا السلام على قلوبكم جميعًا .