حوار / كنزى سعيد .
" احمد نصر الصعيدي " تاجر ذهب ابن تاجر ذهب ، من محافظة البحيره
• بقالك كام سنه في المهنة ؟
- بشتغل في المجال ده من اول ما فهمت احسب واعد ازاى تحديدا سنة 2000
• ما هو أقصي حد قد يصل له سعر الذهب خلال الفترة المقبلة ؟
- هو ممكن نجتهد ونحدد مسار الذهب سواء كان صاعد أو هابط ولكن محدش يقدر يستهدف سعر بعينه و بالذات في فترة شديدة التذبذب زى دى ، ولكن بشكل عام الذهب بيزدهر في الأزمات وخاصة ان الازمة المرادى جيوسياسية يعني حرب ، يعني مازال صعود الذهب مرجح اكتر .
• ما توقعات مستقبل أسعار الذهب ؟
لو راجعنا تاريخ سعر الذهب في مصر أو حتي الشاشه العالمية هنجد ان الذهب اخد موجة صاعده لم تتوقف إلي الآن و لكن تخللها تذبذب أو تصحيحات أو جني أرباح بسبب هبوط السعر لبعض الوقت ولكن مع الوقت بيرجع يزيد و يعمل قمم سعريه اعلي من بعضها إذا علي المدى الطويل أتوقع مزيد من الارتفاعات
• هل الوقت حاليا مناسب لشراء الذهب ؟
- الذهب زينه و خزينه ، أعتقد تحويش الذهب أفضل من تحويش الفلوس ، طالما هيتشال لفتره أكثر من ٣ سنين أعتقد الناس هتستفيد من الزياده في السعر أما إذا احتاجت تبيعه هتبيعه في ثواني ولكن بتكون تحت رحمة السعر طالع و نازل .
• مين بيحدد سعر الجرام في مصر؟
- المسوقجيه يعني تجار الكسر و السبايك
• ما السيناريوهات التي قد تقود لانخفاض أسعار الذهب في مصر ؟
- انتهاء حرب أوكرانيا و روسيا في وقت قصير ده بالنسبة لانخفاض سعر الدولار .
• ما الحكم في ان بعض اصحاب محلات الذهب أن يشتري ذهبا مستعملا نظيفا ثم يعرضه للبيع بسعر جديد ؟
- في الحقيقة ده غير قانونى وفي جهة مراقبه علي المصنعين و التجار اسمها مصلحة الدمغه دول لو دخلوا محل و لاقوه عارضين شغل مستعمل بيتعرض للمسائلة القانونية و بيتعمله محضر
• لماذا هذا الارتفاع المتكرر في أسعار الذهب ؟
- الذهب بيعمل قمم سعريه في الأزمات يعني مثلا الذهب ارتفع بشده تارك خلفه كل الحسابات في أحداث 11 سبتمبر و كمان في أزمة الرهن العقاري في أمريكا و في أزمة التصريحات بين أمريكا و الصين في 2019 وكمان في 2020 في جائحة كورونا و اخيرا حرب روسيا و اوكرانيا .